Etter at kunststudentane pakka ned staffelia og bygget gjekk tilbake til kommunen har det ikkje mangla på forslag om kva Strømgaten 1 skal brukast til. Eitt forslag har vore å bruke bygget til å bøte på kapasitetsutfordringane på dei øvre stega i grunnskulen.
Ein ungdomsskule i sentrum
Bergenhus bydel har berre éin ungdomsskule. Stor tilflytting til bydelen av familiar med born i ungdomsskulealder gjer at kapasiteten på Rothaugen er sprengd. Kommunen har leitt etter ei mellombels og ei langsiktig løysing. No ser den mellombelse løysinga ut til å bli den gamle kunsthøgskulen i Strømgaten.
Byrådet foreslår å bruke Strømgaten 1 som avlastningsskule for å dekke noko av trongen for elevplassar på ungdomssteget i sentrum. Tilbodet er meint å vare i ti år. Strømgaten 1 skal ha plass til 90 elevar. Det freda bygget treng oppgradering og tilpassingar for denne bruken. Etter planen skal ungdomsskulen takast i bruk frå hausten 2023.
Skjerma for støy
Skuledelen er planlagd i 2. etasje med tilgang til toalett i 1. og 3. etasje. Det er naudsynt å gjere nokre tilpassingar av bygget for å stette krav til branntryggleik, inneklima og støy.
Parkeringsplassen skal gjerast om til skuleplass. Skuleplassen får ein støyskjerm i gjennomsiktig glas bak det eksisterande smijernsgjerdet som vender mot Strømgaten. Fleire detaljar om kva som skal gjerast finn du i fagnotat frå Etat for bygg og eiendom.
Prosjektet er rekna til å koste 25 millionar kroner. Byrådet rår utval for finans, kultur og næring til å vedta gjennomføringa av prosjektet.
Historie
Strømgaten vart oppført 1875-76 for Bergen tekniske skole som hadde tilhald her fram til 1963. Då flytta kunsthøgskulen inn. Bygget blei i si tid reist av Bergen kommune med rentefrie lån frå søndagsskule, sparebank og Det nyttige selskap.
Saka skal til vidare handsaming i utval og bystyre.
SE OGSÅ: Les sakene fra byrådet 26. januar