Prosjektet har no kome så langt at det skal gjerast vedtak om å gjennomføre det. Idrettshallen i Alvøen vil få handballbane, tre sett med garderobar, rom for styrketrening, foajé, tribunar og bordtennishall.
I tillegg til sjølve hallen, vil prosjektet bestå av uteareal som skal oppgraderast. Ei 7’ar-bane skal rehabiliterast og hevast til same nivå som 11’ar-bana. Basketballbana blir òg oppgradert.
Et ikkje heile kolla
Den nye hallen skal plasserast ved ei kolle. Delar av kolla må sprengast bort. Prosjektet har freista å utvikle ein idrettshall med eit nedskalert volum som passar til terrenget. Areala legg i stor grad til rette for fleirbruk og ulike typar arrangement.
Det totale bruttoarealet er på 4.000 kvadratmeter. Hallen skal reisast tett på den eksisterande idrettsparken i Alvøen. Medan byggearbeida pågår skal store delar av parken vere i bruk for idretten.
Sparast for 16.500 lastebilturar
Prosjektet har funne løysingar for å bruke om att alle massane på tomta. Det gjer at omgjevnaden blir spart for 16.500 lastebilturar. Hallen skal primært byggast i massivtre og limtredragarar. Grunnfundamenta vil bestå av lavkarbonbetong. Idrettshallen er òg prosjektert med solcelleanlegg på taket. Saman med andre energiløysingar kjem hallen til å bli eit nær nullenergibygg.
Hallen skal venteleg stå ferdig 3. kvartal 2025. Byrådet rår til at prosjektet gjennomførast med ei total investeringsramme på 254,7 millionar kroner. Udekka trong for finansiering er på 19,2 millionar kroner. Det føreslår byrådet blir innarbeidd i den komande handlings- og økonomiplanen.
Byrådet kjem med tilråding i møte 19. mai. Saka går vidare til utval og bystyre.