I mange år har elevane ved Garnes skule ønskt seg nye leikeapparat i skulegarden, særleg for elevar frå åtteårsalderen og oppover.
Elevane fortel at politikarane har sagt at skulen skal få leikeapparat når Bjørnarhallen står ferdig. Men bygginga av hallen har vorte utsett fleire gonger, og dermed må elevane vente lenge på nye leikeapparat.
Elevrådet lurte på om det kunne vere mogleg å få nokre mellombelse leikeapparat medan elevane ventar på dei større oppgraderingane.
– Vi ønskjer oss ikkje noko stort, berre noko medan vi ventar, til dømes ei balanseline eller zipline, sa elevrådsleiarane då dei møtte byråden.
Det nyttar å engasjere seg
Då Haugen besøkte Garnes skule, nytta elevrådet høvet til å halde ein appell. Elevrådet har no fått svar direkte frå byråden. I svaret takkar byråden elevane for at dei engasjerer seg og for at dei tek opp ei sak som er viktig for mange elevar ved Garnes skule.
I brevet peikar byråden på at kommunen er i ein krevjande økonomisk situasjon, og at midlane som er sett av til mindre investeringar og oppgraderingar i 2026, allereie er brukte opp.
– Byrådet har valt mellom anna på grunn av innspela frå dykk, å auke ramma for oppgraderingar av skulegardar i 2027 med 10 nye millionar kroner, skriv han vidare.
– Dersom forslaget frå byrådet om å auke løyvinga til mindre investeringar i skulegardar blir vedteke av bystyret i desember, vil også Garnes skule bli vurdert for å få nye leikeapparat, står det i brevet frå Christian Haugen.
Opplever meistring
Då rektor las opp brevet frå byråden, kjende elevrådet stor meistring.
– Det er fantastisk at byråden har sendt oss eit personleg brev og at han har lytta til oss, fortel elevrådsrepresentantane.
No håper dei at midlane blir vedtatt, og at Garnes skule blir ein av skulane som får nye leikeapparat.
– Vi er òg stolte over at innsatsen vår kan ha bidratt til at barn ved andre skular i Bergen får betre leike- og uteområde.
Demokrati i praksis
Synnøve Hjertaker, rektor på Garnes skule, peikar på at saka har gitt elevane verdifull læring om demokrati og korleis det politiske systemet fungerer. Samstundes understrekar ho at elevrådet arbeider med at medverknad handlar om å seie meininga si og argumentere for det ein meiner er viktig, men òg om å akseptere at ein ikkje alltid får gjennomslag.
– Byråden har bidratt med meir enn midlar til ei viktig sak. Han har òg gitt elevane ei viktig erfaring med demokrati, medverknad og det å bli tatt på alvor, meiner Hjertaker.