Byråd for næring, kultur og idrett Reidar Digranes opnar kulturdagane fredag 17. april kl. 18.00 i Kulturhuset Sentrum. Opninga byr på song, dans, kulturbollar og ei omreisande kunstutstilling laga av 100 barn frå fritidsklubbane i Bergen. Opninga har gratis inngang.
Musikkopplevingar
Musikk og kreativitet pregar dagane. «Ord møter målepensel» samlar litteratur, biletkunst og jazz, medan storbandkonsert med Briotrio og
Hardanger Big Band viser krafta i samarbeid mellom profesjonelle og lokale musikarar.
Arne Sangforening og Ytre Arna Historielag markerar jubileum i samband med Fabrikkstaden Ytre Arna 180 år, med konsert og lysbilete frå syngjespelet Elvæ.
Det blir òg konsertar med Duo Berning og Ådland, Blå Resept, Kamin, Trengereidkor, Haukeland Songlag og Arne Musikforening.
Familieopplevingar
Familiar kan til dømes oppleve togreise med veterantog Arna - Haukeland, open gard på Garnes, familieverkstad på Kulturhuset Sentrum, familiedag i Espeland fangeleir og lesestund på bilioteket.
Verkstader hos Arna Makerspace legg til rette for skaparglede og utforsking for folk i alle aldrar.
Lokalhistorie og -tradisjon
Kunst, handverk og lokal tradisjon finn du på Ådnatun Museum, med husflidsprodukt, bunadstradisjonar og lokale mattradisjonar. Innblikk i lokal historie får du òg gjennom opne dagar og arrangement på Lien Gardsmuseum, Espeland fangeleir og Arna prestegard, og historiske vandringar.
Fokus på kvinnehelse
Ytre Arna Sanitetsforening fortset sitt arbeid med å fremje kvinnehelse i Arna. Under årets temakveld byr dei på faginnlegg om livmorkreft, mammografiprogrammet, KI og brystkreftscreening, samt musikkinnslag ved Morten Endresen frå «The Voice».
Sjå programmet
Bla deg gjennom det digitale programmet her (ekstern lenke til Publitas).
Du kan òg laste ned programbrosjyren i pdf-format her:
Om du ønsker det kan du og følge med på Kulturdagar i Arna si Facebook-side.
Om Kulturdagar i Arna
Kulturdagar i Arna er eit årleg samarbeidsprosjekt mellom kommunen og kultur- og organisasjonslivet i Arna. Arna og Åsane kulturkontor fungerer som koordinator og tilretteleggjar, medan lag, organisasjonar og andre kulturaktørar står ansvarlege for dei ulike arrangementa.
Har du spørsmål? Ta kontakt med Arna og Åsane kulturkontor.
Meir info om ulike kulturdagar i Bergen finn du her.