Tredje påskedag og rett frå påskeferie og på leirskule. Dette var det som møtte elevar og lærarar frå 6.trinn frå Seljedalen og Kirkevoll. Førebuingane var gjort og no skulle det skje – årets første veke med vårleirskule på «timeplanen». Vårleirskule betyr at isen er gått frå vatna i Hålandsdalen. Det betyr òg at skogen byrjar vise sine vårteikn. Alt dette opnar opp for heilt andre undervisningstema enn gjennom vinteren.
Velkomsten er, vel og merke, den same. For elevane handlar det om å bli litt kjend med både nye fjes og med ein ny plass. Første dag på leirksule er alltid sånn – litt nerver og masse nysgjerrighet. Dette er faktisk ein viktig del av leirskulelivet.
Etter at den første natta var overstått, var det tid for bygdedag. Tema for bygdedagen vår er, som alltid, samanlikning av livet i «gamledagar» og i dag. Dette er den raude tråden som føl oss gjennom heile veka, men den gjer seg særleg gjeldande på bygdedagen. Etter ei introduksjonsøkt i klasserommet vårt, Ungdomshuset, var det ut på ulike stasjonar for elevane. Det dreidde seg om å prøve ut arbeidsoppgåver og aktivitetar slik dei kunne sett ut i «gamledagar». Alt frå vedkløyving, vaffelsteiking på vedovn til ei skuleøkt på slutten av 1800-talet kunne elevane velje seg inn på. Ettermiddagen vart nytta til ulike friluftsaktivitetar ute i skogen.
Torsdag var full utedag. Me hadde eit håp om å kunne ta kanoane i bruk denne dagen. Men denne dagen ville det blitt full krasj med tanke på «safety first»-tankegongen vår. Begynnaropplæring i kano passar ikkje saman med null grader, snøvær og vind. Tema for dagen blei derfor skogstur med bålfyring og orientering med kompass. I tillegg fekk me øvd på både fornuftig påkledning for ein slik dag ute og på samarbeid.
Fredag byrja med faste oppgåver og frukost. Deretter utpakking med påfylgjande rominspensjon. Så var det tid for rollespel og besøk i gamle Holdhus kyrkje. Då alt dette var fullført venta siste måltidet for denne leirskuleveka – søtpotetsuppe med focaccia brød. Og sist, men ikkje minst, heimreise. Turen heim til foreldre, sysken og venner som var spente på kva opplevingar leirskuleveka hadde gitt.
Takk for besøket, alle elevar og lærarar, denne første veka med vårleirksule i 2024.