Me kallar det gjerne trelags-prinsippet i friluftsverda – noko elevane frå både Ganes og Ny-Krohnborg har fått høve til å kjenne på. Det handlar eigentleg om å utnytte sin eigen kroppsvarme best mogleg. Ull innerst transporterer fuktighet frå kroppen vekk – og skulle ulla bli våt og fuktig så varmar den like fullt. Ull eller fleece i midten gjer at meir av kroppsvarmen blir verande rundt kroppen og held den varm. Ytterst, for å stoppe vind og regn, trengs eit lag med «værtette» kle – regnkle eller utejakke/utebukse er gode døme på slike.
Trass litt rufsete værmeldingar, som absolutt burde gje gode høve til å øve på trelags-prinsippet, har været vore på «vår side» store delar av veka. Både Ny-Krohnborg og Garnes har latt sine elevar utforska Vengsvatnet med kanopadling, robåtar, garntrekking og fisk. Me har, blant anna, hatt studie av fisk – både utvendig og innvendig (enkelt sagt sløying av fisk).
Skogstur med gruppebål og gradorientering har òg stått på programmet for alle som har vore på leirskule denne veka. Ny-Krohnborg hadde sin tysdag i nordleg retning, mot Heihiller. Her vart det laga fire elevbål under hidlaren – med regnet dryppande på utsida. Garnes tok turen i sørleg retning på torsdag. Tematikken var den same som for Ny-Krohnborg med leirbål og gradorienering på veg heimover etter lunsj.
Onsdag betydde bygdedag og friluftsaktivitetar. Elevane prøvde seg på eit handverk eller ein aktivitet slik livet kunne ha gått føre seg på slutten av 1800-talet. Friluftsaktivitetane onsdag ettermiddag gav alle elevane høve til å fordjupe seg i ein type friluftsaktivitet.
Måndag var, som vanleg dagen for å bli kjent med både plass og nye menneske. Fredag var, som vanleg, avreisedag med utpakking og avslutning av veka.
Takk for ein kjekk haustveke saman med elevar og lærarar frå Garnes og Ny-Krohnborg.
God helg!